Click HERE for an updated profile of the band in English.

Il-grupp Mistura tnieda fl-2012 b’kometa li frammenti tagħha laqtu moħħ il-membri tal-grupp fl-istess ħin u li għalhekk ħassew li kellhom jimxu f’din it-triq biex jibqgħu ifakkru dan l-avveniment. Il-membri prinċipali huma Antonio Olivari, li jikteb il-maġġoranza tal-kanzunetti u jdoqq naqra kitarra żul minn hemm, u Malcolm Bonnici, li jkanta u jdoqq il-kitarra meta jżul minn hemm Antonio. Normalment live ikollhom magħhom ukoll ħbieb aljeni li nzertaw kienu fuq il-kometa stess. Dawn jipprovdu t-talent mużikali ‘out of this world’ tagħhom. Mistura pparteċipaw fl-Għanja tal-Poplu fl-2012 u rebħu l-premju WAFA għall-aqwa talent ġdid.

Informazzjoni iktar ‘normali’ dwarna ssibuha fil-paġna li ddedikawlna tal-M3P li ssibuha hawn. Apparti hekk din hija intervista magħna li biha tistgħu issiru tafuna aħjar:

Flimkien mal-effetti meħtieġa tagħha, din il-mistura tista’ tikkawża xi effetti mhux mixtieqa bħal ċaqliq taċ-ċelluli tal-moħħ, dwejjaq dwar l-istat tal-uman fid-dinja u nawżja. Għalkemm dawn l-effetti sekondarji mhux kollha jistgħu jseħħu, jekk iseħħu jistgħu jeħtieġu attenzjoni medika jew psikoloġika. Jew inkella xi kors tal-filosofija u ftit sens komun.

Il-kelma Mistura għandha 3 tifsiriet: (1) L-ewwelnett ġejja mill-kelma ‘misto’ mit-Taljan u tfisser taħlita; (2) It-tieni tfisser ukoll mediċina li wieħed jieħu meta jkun qiegħed sew biex jiġi aħjar; (3) Il-kelma, jekk titqies fil-plural, tfisser ‘moħbija’. Għalfejn qed ngħidu dan? Boooqqq.

Il-kliem tal-kanzunetti ta’ dan il-grupp huma l-opinjoni strettament personali tal-kantawtur u bl-ebda mod ma tirriflettu l-opinjoni professjonali preżenti jew futura tal-postijiet tax-xogħol fejn jaħdmu l-membri kollha tal-grupp.